Al raduno dela “Ultima Mularia” go trovà un bel libro; altroché picio libro come che disi el autor esule Glauco Dinelli, cugin dele tre "bele mule" Nedda, Franca e Fulvia. El libro del Dinelli, un insieme de bei e tristi ricordi polesani, xe intitola “Lontani anni verdi - Ricordi di un muleto polesan”. La letura fa riesploder la nostalgia dela nostra cara e vecia POLA. El "muleto" Glauco me ga fato riveder, tra altre robe, el caro "Cine Pistola" dove qualche malignaso “mulo”, forsi... de via Carpaccio, slungando la man, dito medio e anulare sconti, messa nel flusso dela machina de proiession, fasseva rivar sula tela un poco oportuno corno: anche questa iera goduria no solo cavai e pistole. Ma al "Pistola" iera spesso un altro spetacolo sensa sorapresso. Savè, e se no savè ve lo digo mi, al "Pistola" la platea gaveva due ordini de posti ma sensa divisioni: bastava comprar el bilieto che costava de meno e sentarse nel posto più comodo; solo che la "maschera" - ocio vigile - ciapava el malignaso mulo per le rece e lo portava al suo posto. Dopo el "Pistola", Glauco ne ga fato leger pagine tristi: "Fosche nubi sull'orizonte politico". Xe vero, el 21 marso 1946 iero anche mi, mulo de gnanche quindise ani, a manifestar per Pola italiana in tel muso a quei bei campioni dela Comission interaleata per i confini. In piassa Foro iero in meso ai speranssosi italiani. Me ricordo, come fussi adesso, in tel angolo tra la piassa e via Sergia, la lugubre figura de un titin, bruto s...vo, anche se forsi el iera... talian. La visita dela Comission, ciarlatani in libera uscita: tuto za deciso a dano de chi gaveva perso quela mona de guera, inutilmente ... vinta da quei del Sud. A Pola, in testa a tante manifestassioni spontanee - dai 15 ai 20 mila polesani per una Pola da conservar italiana - e insieme ai partigiani italiani del Api xe, purtropo, mancadi nel CLN de Pola omini coragiosi e decisi. Tendendo la man ai slavi, con la paura de esser ciapadi per fassisti nel risponder ala violensa con la violensa, i xe restai fermi ale afermassioni de principio, confidando nei Aleati, nel dirito dele genti e nela autodecision dei popoli. Iera brave e oneste persone - come giustamente disi Vivoda - nate e cressude ai tempi dela felix Austria e restai con quela mentalità. Certo no dei combatenti. Pola ala Federativa, Gorissia a l'Italia: meo no pensarghe. Meo tornar al "Cine Pistola", a farse tirar le rece dala maschera. RUGGERO BOTTERINI P.S.: Le offerte raccolte durante il Raduno per il libro di Glauco Dinelli, pari a 335 €, sono state dall'Autore generosamente girate a “L'Arena di Pola”. La Redazione ringrazia.