Elezioni... Nulla cambia eppure tutto è completamente diverso. Sono passati sessant’anni ma il teatrino della politica italiana ha continuato a proporci il lato più becero della campagna elettorale da poco conclusasi. Spigolando tra le pagine del nostro vecchio “El Spin” del 17 novembre 1946, leggiamo questo simpatico dialogo tra due personaggi mitici della Pola ante-esodo. Siora Gigia e Siora Meniga Siora Meniga: -“Ma la me disi, siora Gigia, come la tira avanti lei? Mi no so cossa dir fia, tuto cressi: le fliche no basta e ogni giorno xe una nova penitensa!”- Siora Gigia: -“Dona mia benedeta, a mi la me conta? Mi vegno in mercato più per abitudine che per altro... Mi per strada parlo sola, che i me ciaparà per mata, ma no me dago de pati che tuto deve esser cussì caro... Chi pol andar avanti? Ghe volessi el portafoglio a fisarmonica batù de bori ...”- Siora Meniga: -“E ghe xe più de un che lo ga, la sa? Ghe xe certi che specula e che se ingrassa come porchi... Quei, la vedi, xe reassionari!”- Siora Gigia: -“Sì fia! Ladri. Ladri mi li ciamo...”- Siora Meniga: -“E pensar che se podessi star ben, parchè la roba no manca... La se ricorda siora Gigia i bei tempi? Che matade che fassevimo, e che magnade per Nadal e per l’ultimo de l’ano. Iera altri tempi quei!”- Siora Gigia: -“Cossa la xe anche lei come sior Scorcola de l’Osteria de l’alegria che i ne dà per radio? Me ricordo sì anca mi. Cossa la vol farghe. Semo cussì disgrassiai adesso noi altri!”- Siora Meniga: -“Bon se vedi qualcossa de ciaro?”- Siora Gigia: -“Ciaro? Peso che de note, fia! No se capissi un boro, gnente. Son cussì stufa dona mia...”- Siora Meniga: -“Ah sta pulitica. Ogni giorno fasso barufa con mio marì. “Tasi, moniga de baba! - el me disi - cossa ti te intrighi ti che no ti capissi gnente!” E invesse capisso più de lù... Ah se gavessimo noi done in man la pulitica el mondo andaria ‘ssai meo!”- Siora Gigia: -“Sicuro... La vedi coss’ che i combina ‘sti sempiai de omini. Solo i ciacola, i fa barufa, i siga e no i conbina un’ostriga. Noi, noi ghe volessi! Un per de babe de mercato metessi a posto tuto... Ma ‘desso scampo parchè se mio marì torna e no trova pronto el pranso el me onsi!”- Siora Meniga: -“Ah! Se gavessimo noi le braghe!”- Madonna dei campi Parafrasando Vittorio Alfieri, anca mi posso dir: “Volli, fortissimamente volli”. Xe nota, ai letori de L’Arena, la mia mania de “ciacolar” de Cese e Cesete. La mia passion, lo ripeto, vien dal desiderio di veder questi edifici eclesiali che, anche se pici, in compenso i xe pieni de tradissioni popolari, messi in pie da ati di fede. I dintorni de Rovigno (e non solo) xe pieni de Cesete e Capelete. E tute con una propria storia, spesso ligada a Miracoli. Per quei che credi! Gavevo leto, per quel che riguarda la Ceseta dela “Madona dei canpi”, che qua terminava le rogassioni (processioni) dei fedeli rovignesi. In questa Ceseta, inoltre, se implorava la Madona, per far piover, in tenpi de permanente siccità! Provare per credere. Da ani la andavo sercando: ma una roba xe trovarla su la carta geografica, ben diverso stanarla sul posto. Questo me diventava ancora più dificile guidando l’automobile. Questo ano, bel comodo, sentado in coriera verso Pola, dopo pochi minuti da Rovigno me se para davanti la frecia stradal con l’indicassion “Madonna dei campi”. Dago un’ociada al tenpo e fati do conti, valuto una distanza de due tre chilometri. Stavolta te go cucà. Sì, ma come ghe vado no gavendo più l’auto? Ghe invento una flocia (Madona perdonime) a mia moglie, disendoghe: domani ciapo una bicicletta e vado in pineta a fare un gireto. “Bravo, bravo, Non può farti che bene.” La me rispondi. El giorno dopo salto in bici e via lungo la strada che porta verso Pola. Rivado al bivio co’ la freccia giro drento una stradeta de canpagna e pedala, pedala per almeno do chilometri, rivo davanti a la sospirada Cesa. Se trata de ‘na costrussion del 1363, con repessadure varie fate durante i secoli. Ma questo no conta. El posto xe unico, con un picio campanil a vela su un fianco. No me xe stado possibile fotografar el frontal parché davanti iera postegiada un’auto ma, soratutto, xe un enorme albero che’l coversi tuto. Adestra, in basso, squasi invisibile, xe la mia bicicleta e... tanto per darghe una data a ‘sta scoperta iera el giorno del mio 76° conpleano. F.D’A Definissioni bauche di Silvia Lutterodt Sizzi - foto Deviassion - Bruta parola. Se no ti guanti la via prestabilida ti te perdi, sia in senso metaforico che in pratica. Se se trata de deviassion del pensier, a forsa de bassilarghe sora, ti svilupi una fissassion! Nespole - Le doveva esser 'ssai dure per diventar sinonimo de... bote de orbi! Quadrato - Figurativamente parlando, qualsiasi ogeto quadrato da' el senso dela solidità e stabilità Cossa xe piu' sicuro de un cubo de cemento? Equilibrio, pragmatismo, mancansa de fantasia, de ideali, e perfin de intraprendensa per ecesso de immobilismo. Proprio el caso de dir: un tipo quadrato? Dove che ti lo meti, la’ el stà! Destin - Malasorte. Infati, co se disi "Destin!" con tanto de punto esclamativo, no se aludi de sicuro a una fortuna che te piovi dal ciel o a una piacevole sorpresa. Rinasser - Ghe xe mai sta qualchedun che fossi nato due o piu' volte? S.L.S.