Nele rubriche de medicina de una volta i dotori racomandava ai studenti de far i conpiti de matina de bonora, perché dopo una bona dormida la mente xe piu’ fresca e riposada, quindi se fa più presto a tignir a memoria periodi lunghi e regole conplicade e dificili. Per mi, conosser a scola tanta mularia diversa me iera una fonte de «studio» sui carateri individuali. Essendo una svoiada de prim’ordine, me interessava capir come che iera i altri. Cussì, anche se no pareva, stavo atenta a quele discussioni - no tropo frequenti per la verità -che ognidun fasseva sule proprie preferense e sul modo de studiar. Tanti de lori no gaveva gnanche bisogno de spiegarse perché la voia de far ben bastava. Invesse quei duri de conprendonio e un poco lenti ad assimilar le lessioni, ma che voleva farse veder, i se sacrificava sui libri ore e ore. No i andava fora a giogar gnanche la festa. Solo a Nadal i se concedeva una pausa, e perfin durante le vacanse i perdeva un per de ore de matina a ripassar le lessioni de l’ano scolastico ‘pena finì. Li gavé conossudi voi tipi conpagni? Mi sì! Altri invesse iera dela categoria dei «ipersensibili». Le condissioni per studiar gaveva de esser favorevoli, silensio de tomba, se no no i se podeva concentrar. El minimo rumor li disturbava e i doveva ricominciar de novo. Una mia amicheta udinese iera piutosto «pedante». La gaveva de veder sul tavolo libri e quaderni, righei, pene e matite sistemadi in un certo modo altrimenti la fasseva falische per el nervoso. Mia sorella, ai sui tenpi, inparava i poemi a memoria declamandoli ad alta vose. Mio fio invesse spesso - prima de andar a scola - finiva i sui compiti butà per tera ne l’andito davanti a la porta ‘verta. «Cossa no ti podevi far tuto ieri sera?» ghe domandavo. E lu me rispondeva: «Fra tante robe che avevo de far me go dimenticado.» Co’ mia fia frequentava i corsi superiori la me contava de un suo conpagno de classe che gaveva la memoria fotografica. Ghe bastava leger un per de volte e po’ el svolgeva el conpito scrito come se el gavessi el libro davanti. Questa invidiabile facoltà ghe permeteva de ciaparsela comoda anche in tenpo de esami, de andar a divertirse tutà la note sensa preocupassioni, po’ darghe un’ociada ai testi e ...passar a pieni voti. Pochi podeva conpeter con lui. Fra tanti ghe iera el caotico, el disordinatiss i m o , che se qualchedun ghe gavessi messo a posto le sue carte, nol gaveria trovado più gnente. Altri che nele bele giornate d o v e v a s t u d i a r de fora, in giardin o terassa o p a s s e - g i a n d o per strada o nel verde. Fra i eccelsi nostrani no mancava quel che se fasseva aiutar de qualchedun piu’ bravo nela specifica materia. A questa categoria ghe iero anche mi che, ale elementari, co’ mia mama iera stufa de sugerirme idee per i mii conpitini de italian, andavo de mia sorella, se no la gaveva tropo de studiar. Ale medie, trovavo conveniente, prima che sonassi el canpanel per la lession, copiar i conpiti de matematica o algebra de una mia conpagna de classe, un vero genio che la se prestava a passarmelo a mi e a un per de altri muleti. De quei tenpi me ricordo un putel, de sicuro uno dei più bravi dela nostra classe, che el iera special nel disegno. Ma lu no’l aiutava mai nessun, mi invesse per daghe una man de scondon a la mia c o n p a - gna de b a n c o , b a d a v o poco ai mii lavori. Sto picio «Michelangelo », za bravo a s c o l a portava con lu certi disegni che ne fasseva andar in visibilio, no solo le lessioni assai ben fate, ma altri ancora, de sua fantasia. E co ierimo pronti per la partensa poco prima che le scole se serassi definitivamente el se gaveva fato una reputassion gavendoghe disegnà a tute le mulete, sul albo dei ricordi, una splendida Arena con la dedica. Mi iero stada l’ultima a consegnarghe el libreto perché gavevo dovudo spetar che un’altra mia amica me lo tornassi. Devo dir la verità ‘sto «Michelangelo » me gaveva fato tirar la lingua de fora, prima de tornarme l’albo: proprio l’ultimissimo giorno de scola. E co’ el me lo ga da, con mia grande sorpresa e massima delusion go trovà che dentro iera solo la sua firma, elegante e sotolineada ad arte. E l’Arena che el ghe gaveva disegnado a tute le altre, bela, piturada ad aquerelo, dove la iera? Delusa ghe go dito: «Ti me vol dir che ti te ga ciolto tuto sto tenpo per scriver solo el tuo nome?» «Con tanti preparativi no go trova’ un minuto per farte l’Arena » el me ga risposto ridendo. «Ma ara che bela firma che ti ga qua! Basta questa per veder la man de un artista! La xe la meo de tute. E a ti, che ti son brava in disegno, la te basta!» Cossa podevo dir? «Tiente in bon!» ghe go risposto intanto che metevo l’albo dentro la cartela. Subito dopo me gaveva dispiasso che no me iera vegnù in mente de zontarghe: «lodite muss che ti ga ‘na bela coda!» El giorno dopo una mia conpagna de classe me gaveva spiegà, in confidensa: «Ti sa per cossa che nol te ga disegnà l’Arena nel album? Perchè nol iera lui a farla, nè el fasseva tuti quei splendidi disegni che el portava a scola. Bravo sì, ma iera suo cugin a farli, iera lu el vero artista!» S.L.S.