Didascalie: Barbana Docastelli Carissimi Livio, Giorgio e Aldo, voi che, per motivi de lavor, gavè dovudo andar via de Cremona dopo l'inaugurazion, no savè cossa che ne toca sentir quando che passemo per de ore in mostra fra le vostre splendide fotografie! Magari sarè gelosi che ne toca goderse i complimenti dei Cremonesi che veramente in grande numero i vien a veder 'ste magnifiche imagini de la nostra cara Istria; ma dovè saver che ne toca anche sorbirse le critiche, no sempre delicate, dei istriani che, inveze de goderse i colori meravigliosi dei fiori e de la campagna istriana, invece de scoprir 'ste ciesete che mai gavemo viste, perché sconte in certi cantoni de l'interno dove che no passa le strade maestre, i se lamenta che ghe manca el campanil de Dignan, che no xe la ciesa de sant'Eufemia, el Palazzo de Capodistria, la basilica de Parenzo, e, quando che no i trova altri difeti ne l'Istria fotografada, i va a zercarli in so «mare»... Aquileia! Mia cugina me dixi: «Ciò, nane, ma cossa xe sta mostra senza la mia Rovigno? Ma dighe un po' a quel Livio che Rovigno xe antica, artistica, bela! Che me dispiasi per lu, ma go 'vudo una granda delusion a veder ch'el la ga dimenticada». E un'altra istriano: «Caro presidente, come xe sta roba!?! Vengo qua per veder le beleze artistiche de l'Istria e no trovo propio la mia Parenzo! l'eufrasiana cossa xe? E le case antiche?» Un amico quasi me salta adosso: «Ciò Mario, qua me toca vignir a insegnarghe a maestri e architeti! Cossa xe sta "madre" in dialeto polesan? Polesani de quatro colpi! No ve ga mai tocà de farve dir de pici "Tu mare... in capel"?» Questo ne toca sentir, cari mii, e no ste pensar che noi sterno ziti: ghe dixemo de leger l'invito, dove che ghe dixè ciaro che voi no volevi far veder quel che se trova in cartolina o su tuti i opuscoli turistici. Ghe disemo che gavè fato chilometri de strade bianche e caresade per andar a trovar quel che pochi o gnissun conossi; e che ghela gavè fata, perché fin el nostro Mirabela, che per tanti anni el ga studià i monumenti de Pola e de l'Istria, xe riussido a meraviliarse de trovar qua a Cremona robe che no 1' gaveva mai visto! Senza parlar de quel che scrivi Bruno Artusi: «Io Istriano, non sapevo che l'Istria avesse tante vestigia di meraviglie architettoniche; le ho conosciute a Cremona per merito dei bravi Del Pino». E xe 'ste poche robe che ne consola e ne fa dimenticar tuto el lavor che gavemo fato insieme con voi e ne fa acetar certe critiche. Ne consola che per ognidun che se lamenta perché ghe manca Rovigno, xe uno che ne ciama, co i oci lustri, per mostrarne la casa de su nono, che per puro caso xe stada fofografada vicin al castel. Ne consola che dopo quela che xe rabiada perché no xe Parenzo, riva una che ne vol dir che in quela tal cieseta la ga fato la prima comunion. Che per un Polesan che va a coreger el cartel del Livio, xe una cremonese che con santa pazienza la se copia su l'opuscolo la poesia del nostro Bepi. Che dopo che la lussignana se ga lamentado perché gavemo dimenticado una foto de Lussinpiccolo, me riva 'sto bilieto de tre coleghe: «Reduci dalla visita alla mostra Istria, ci complimentiamo vivamente per la bellezza, la intelligente sintesi dei monumenti presentati, la favolosa luce e poesia di ogni fotografia. Ringrazia per noi i tuoi amici istriani a cui va tutta la nostra stima e calda solidarietà». Sì, cari mii, voi che sè lontani no sentì le critiche, ma anche no godè de 'ste picie robe che dà sodisfazion e che ne sburta a continuar su 'sta strada, malgrado qualche delusion per i amici de l'esecutivo cremonese MARIO IVE